People Salvation Movement

Diane Rwigara akomeje politiki mu gihe nyina akajije amasengesho

Aho ubushinjacyaha bw’u Rwanda buhagarikiye gukurikirana abo kwa Rwigara, Diane Rwigara avuga ko agiye gukomeza politiki mu gihe ngo na nyina akomeje gukaza amasengesho.

Ubushinjacyaha bwari bwatanze ubujurire ku wa 27 Ukuboza 2018, bujuririra icyemezo cy’Urukiko Rukuru rwo kurekura Diane Rwigara na nyina, Adeline Mukangemanyi.

Umuvugizi w’Ubushinjacyaha bw’u Rwanda, Nkusi Faustin aganira na VOA, yavuze ko iki cyemezo cyafashwe nyuma yo kugirwa inama na Minisitiri w’Ubutabera bw’u Rwanda, Busingye Johnston.

Yagize ati “Twari twajuriye nyuma tuza kubona ibaruwa ya Minisitiri w’Ubutabera idusaba ko twareka ubujurire ngira ngo rero ibi ni ibisanzwe mu mategeko hashingiwe ku ngingo ya 145 mu Itegeko Nshinga rya Repubulika y’u Rwanda, yemerera Minisitiri w’Ubutabera kuba yatanga ayo mabwiriza abantu ntibagire uwo bakurikirana, ibyo ni amategeko abiteganya, nibyo twubahirije nta bindi”.

Akomeza avuga ko nta bantu bakomeye bari inyuma y’iyi dosiye y’abo kwa Rwigara nk’uko byagiye bivugwa mu bitangazamakuru, ahubwo ko ibyakozwe byose bikurikije amategeko, ati “Ni ibintu bisanzwe, ni amategeko aba yarubahirijwe, ntaho bihuriye nibyo bavuga”.

Diane Rwigara avuga ko yishimiye iki cyemezo agashimangira ko na mbere hose bari abere. Ashimangira ko akomeje urugendo rwe muri Politiki, na nyina akaba akomeje amasengesho.

Ati “Twabyakiriye neza cyane, birumvikana twishimye kandi n’ubundi turi abere nta mpamvu zifatika ubushinjacyaha bwari bufite bwo kujurira”.

Akomeza avuga ko batangiye umwaka neza, ati “Cyane, dutangiye umwaka neza, gahunda zanjye ni ugukomeza urugendo rwanjye rwa Politiki kubera ko ibibazo byanzanye muri Politiki kugeza n’ubu ntibirakemurwa, bivuze ko nanjye ngomba gukomeza guharanira ko ibintu bihinduka,… Nzakomeza gukorera mu mucyo no mu kuri”.

Abajijwe uko na nyina yabyakiriye, yagize ati “  Yabyakiriye neza cyane, n’ubu arimo gusenga ashima Imana, Eeh! Ibye ni amasengesho, abonye n’umwanya wo kubikomeza neza nta kibazo”.

Ku wa 6 Ukuboza 2018, nibwo urukiko Rukuru rwarekuye Diane Rwigara na nyina nyuma yo kubagira abere ku byaha baregwaga.

Leave a Reply

Your email address will not be published. Required fields are marked *

shares